?

Log in

Нараджэньне думак

Feb. 7th, 2017 | 03:14 pm

У гэты марозны дзень
Пазіраючы на гару Таўра
Праз вакно што на аднайменнай вуліцы
Падумалася штосьці даволі банальнае
Магчыма вы самі шматкротна пра гэта
Ў падобны марозны дзень разважалі
Але інтуіцыя мне падказвае
Што большасьць людзей
Мабыць ніколі пра гэта сур’ёзна ня думала
Дык вось
Мне падумалася
Што я маю вельмі мала кантролю над тым
Як у маёй галаве нараджаюцца думкі
Я амаль ніколі з дакладнасьцю не магу іх прадбачыць
Усё тое
Што я зараз думаю
Нараджаецца бы праз нейкі магічны акт
Унутры кавалку мяса
Што складаецца з 100 мільярдаў нэўронаў

Мае думкі
Напрыклад тое банальнае
Што я ў дадзены момант
Падумаў
І па нейкай прычыне пішу гэта ў Word-аўскі файл
Каб потым запосьціць у інтэрнэт
Каб хтосьці пабачыў
І нешта падумаў у адказ
(напрыклад, якую чаўпяжню гэты прыдурак нясе)
Дык вось
гэта хрэнь узьнікае
Ў вынікі сынапсаў
То бок кантактаў нэўронаў
Што фармуюцца з хуткасьцю да 1000 сыгналаў
У сэкунду
Мабыць гэта і ёсьць адказ
Якім і варта было б задаволіцца
Але як узьнікаюць канкрэтна вось гэтыя думкі
Якія я зараз агучваю

Відавочна гэты
Калейдаскоп сынапсаў
Фармуецца на аснове
Маіх былых і цяперашніх досьведаў
Як рэакцыя
На навакольле і разнастайныя стымулы
Але мне ад гэтага не лягчэй
Бо кантролю ў мяне як суб’екта
Які зараз штосьці тут як бы думае
Не было
Няма
І ня будзе

Мне кажуць
Калі
Праз вялікую канцэнтрацыю
Ўвагі на тым моманце
Ў якім я ёсьць зараз
Я здолею
(а гэта ўдаецца нямногім)
Зазірнуць глыбока ўнутр таго
Што прынята лічыць сабой
То вось гэтае такое звыклае
І любімае
Роднае і зразумелае “Я”
Ўсё больш і больш размыецца
І зьнікне
І раптоўна я зразумею
Што я ўвесь гэты час жыў у ілюзіі наяўнасьці “Я”
То мне стане лягчэй

Ня ведаю
Магчыма
Гэта сапраўды вызваляе

Пайду
Паспрабую

Link | Leave a comment | Share

***

Nov. 4th, 2016 | 04:06 pm

У віртуальнай Вільні лета
Краскі на пранцузскіх гаўбцах
Шаржысты малююць партрэты
Сонца сядае за замкавы дах

У рэальнай Вільні холад
Віленчукоў не відно
Сядзім бы хікакаморы
У экранах усё жыцьцё

У віртуальнай Вільні сьвята
Сьпевы, жанглёры, дуда
Дзеці ўзрываюць пэтарды
Шаманіць касьцёр Рамува

У рэальнай Вільні коркі
Машыны вязуць нас дамоў
З офісаў і каворкінгаў
Каб у кампутарах зьнікнуць зноў

Link | Leave a comment | Share

Адкуль бяруцца вершы?

Aug. 22nd, 2016 | 02:57 pm

Няма аніводнага вершу, які б я напісаў сам.
Я не магу адказваць за мой цяперашні стан.
Тое, што ў дадзены момант я ў форме верша пішу,
Непадкантрольна і незразумела мне самаму.

Я не магу прадбачыць ня толькі наступны радок,
Наступнае слова маё пакуль што мне поўны змрок.
Ха, ты думаеш, лепшы ты неяк тут за мяне?
Падумай, адкуль што бярэцца, браце, у тваёй галаве!

Ты мог шчэ хвіліну таму прадбачыць, што будзеш чытаць
Мой гэты дзіўны верш і пра штосьці там разважаць?

Link | Leave a comment | Share

Пакуль вы лавілі пакемонаў

Jul. 17th, 2016 | 12:19 pm

Пакуль вы лавілі пакемонаў
Элан Маск прызямліўся ў Гародні
А ў Менску на Сходзе Ўсенародным
Кажуць, зьявіўся прывід Зянона

Пакуль вы лавілі пакемонаў
Перамог Лукашэнку кібарг
У гульню пад назвай выбары
У реэльнасьці, не на смартфоне

Пакуль вы лавілі пакемонаў
Дзермант стаў лібералам
А Белсат – дзяржаўным каналам
Ну а гербам зноў стала Пагоня

Пакуль вы лавілі пакемонаў
На Беларусь напала Расея
Вашу хату зьнішчыла дронам
Але для вас гэта шчэ не падзея

І я ведаць пра гэта ўсё не хачу
Пайду лепш палаўлю Пікачу

Link | Leave a comment | Share

Міхась

May. 4th, 2016 | 09:43 pm

Яго звалі Міхась, ён быў кібаргам
З-пад Маладэчна. Першым,
Хто патрапіў у выбарку
Экспэрымэнту на ажыўленьне
З нашага краю. Паўстаўшы
Зь мёртвых, ён хутка зрабіўся
Найлепшым знаўцам
Мовы, што даўна забылася.
Ён пісаў вершы сотнямі і адначасова
Лепш за Купалу і Багдановіча,
Пераклаў на ўсе мовы галяктыкі Арлова,
Разанава і Хадановіча.
Міхась, звышрозум з-пад Маладэчна,
Быў адзіным з гэтага краю,
Каму наканавана жыць вечна,
Не спазнаўшы ні пекла ні раю.
Жыў наш Міхась вельмі доўга,
Даўжэй за Беларусі гісторыю,
Але вечнасьць – рэч няўлоўная.
Паміраюць нават зоры.

Link | Leave a comment | Share

***

Apr. 24th, 2016 | 09:30 pm

Сонца сядае за чырвань цэглы суседняга дому
Віленскае неба пачырванела ў тон
Сяджу бы ваяр у чырвоным сваім бастыёне
Праводжу крыніцу жыцьця за гарызонт

Ладна, сябры, нават ня думайце, што гэта
Чарговае вершаванае бла-бла-ба
Хочаце вершы? Папрасіце Яндэкс-паэта
Ён настругае іх гігабайты як двойчы два

Link | Leave a comment | Share

Words

Apr. 4th, 2016 | 03:13 pm
music: Scorpio Doctrine - Via Liminalis [EP] (2014)

letting the words loose
onto this sheet of blankness
they chase after ever-elusive meaning
of life

they are always weird
when the language is dead
and there’s no one to appreciate
the subtleties of my lion-heart arrogance
my cherished ego
my salesmanshit
my nanoscopic greatness

I love them
I taste them
I am on point
and off target
with their little help
as I channel my ignorance
in this simplistic code

some would call it
poetry

Link | Leave a comment | Share

***

Feb. 12th, 2016 | 03:37 pm

А ты знайшоў свайго д’ябла? Пашукай у дэталях.

Link | Leave a comment | Share

Беларушчына

Feb. 4th, 2016 | 01:28 pm

Беларушчына бы кактэйль молатава
Кінь яе ў АМАП
Кожнае маё слова золата
Я беларус не кацап

Беларушчына песьня вольная
Залі яе на Youtube
Ці з гуртом ці проста сольна
Шар па сьвеце моўны цуд

Нас запраграмавалі беларушчынай
Яна гэта наш культурны код
Яна ў нашым сэрцы і нават тлушчы
Кожны дзень і круглы год

Link | Leave a comment | Share

***

Jan. 29th, 2016 | 02:29 pm

У ціхім віры
Мыю свой твар
Неба хвалюецца

Link | Leave a comment | Share